ਸ੍ਰੀਨਗਰ, 20 ਅਗੱਸਤ : ਈਦ-ਉਲ-ਫ਼ਿਤਰ ਦੇ ਜਸ਼ਨਾਂ ਮੌਕੇ ਜਿਸ ਸਮੇਂ ਮੁਸਲਮਾਨ ਮਸਜਿਦ ਵਿਚ ਨਮਾਜ਼ ਅਦਾ ਕਰ ਕੇ ਖ਼ੁਸ਼ੀਆਂ ਮਨਾ ਰਹੇ ਸਨ, ਉਸੇ ਸਮੇਂ ਕੁੱਝ ਵਿਖਾਵਾਕਾਰੀਆਂ ਵਲੋਂ ਸ਼ਹਿਰ ਵਿਚ ਪੁਲਿਸ ਦੇ ਵਾਹਨ ਨੂੰ ਅੱਗ ਲਗਾ ਦਿਤੀ ਗਈ ਅਤੇ ਤਿੰਨ ਪੁਲਿਸ ਕਰਮਚਾਰੀਆਂ ਨੂੰ ਈਦਗਾਹ ਖੇਤਰ ਵਿਚ ਕੁੱਟਮਾਰ ਕਰ ਕੇ ਜ਼ਖ਼ਮੀ ਕਰ ਦਿਤਾ ਗਿਆ। ਜਿਵੇਂ ਹੀ ਨਮਾਜ਼ ਖ਼ਤਮ ਹੋਈ, ਸੈਂਕੜੇ ਨੌਜਵਾਨਾਂ ਨੇ ਸੂਰਾ ਵਿਖੇ ਸੜਕ ਦਾ ਰਸਤਾ ਰੋਕ ਦਿਤਾ ਅਤੇ ਪੁਲਿਸ ਦੇ ਜਵਾਨਾਂ ਨੂੰ ਵਾਹਨ ਵਿਚੋਂ ਉਤਰਨ ਲਈ ਕਿਹਾ ਪਰ ਜਦੋਂ ਪੁਲਿਸ ਦੇ ਜਵਾਨਾਂ ਨੇ ਭੱਜਣ ਦੀ ਕੋਸ਼ਿਸ਼ ਕੀਤੀ ਤਾਂ ਭੀੜ ਨੇ ਉਨ੍ਹਾਂ ਦਾ ਕੁਟਾਪਾ ਸ਼ੁਰੂ ਕਰ ਦਿਤਾ। ਜ਼ਖ਼ਮੀਆਂ ਵਿਚ ਇਕ ਸਹਾਇਕ ਪੁਲਿਸ ਇੰਸਪੈਕਟਰ ਵੀ ਸ਼ਾਮਲ ਹੈ।
ਘਟਨਾ ਦੀ ਸੂਚਨਾ ਮਿਲਦਿਆਂ ਹੀ ਵਾਧੂ ਪੁਲਿਸ ਦੇ ਜਵਾਨ ਅਤੇ ਅਰਧ ਸੁਰੱਖਿਆ ਦਸਤਿਆਂ ਦੇ ਜਵਾਨ ਤੁਰਤ ਮੌਕੇ ’ਤੇ ਭੇਜੇ ਗਏ ਤਾਕਿ ਖੇਤਰ ਵਿਚ ਅਮਨ ਅਤੇ ਕਾਨੂੰਨ ਦਾ ਪ੍ਰਬੰਧ ਬਰਕਰਾਰ ਰਖਿਆ ਜਾਵੇ। ਭੀੜ ਨੂੰ ਖਿੰਡਾਉਣ ਲਈ ਪੁਲਿਸ ਨੇ ਹਵਾ ਵਿਚ ਗੋਲੀਆਂ ਚਲਾਈਆਂ ਅਤੇ ਅਥਰੂ ਗੈਸ ਦੀ ਵਰਤੋਂ ਵੀ ਕੀਤੀ। ਪੁਲਿਸ ਨੂੰ ਇਸ ਖੇਤਰ ਵਿਚ ਹਿੰਸਾ ਦੀ ਕੋਈ ਸ਼ੰਕਾ ਨਹੀਂ ਸੀ। ਅਧਿਕਾਰੀਆਂ ਅਨੁਸਾਰ ਕੁੱਝ ਵੱਖਵਾਦੀਆਂ ਨੇ ਰਾਜ ਸਰਕਾਰ ਦੇ ਪਾਬੰਦੀਆਂ ਸਬੰਧੀ ਹੁਕਮਾਂ ਦੇ ਜਵਾਬ ਵਿਚ ਪੁਲਿਸ ’ਤੇ ਹਮਲਾ ਕੀਤਾ। ਸੂਤਰਾਂ ਅਨੁਸਾਰ ਹੁਰੀਅਤ ਕਾਨਫ਼ਰੰਸ ਦੇ ਚੇਅਰਮੈਨ ਮੀਰਵਾਇਜ਼ ਉਮਰ ਫ਼ਾਰੂਕ ਅਤੇ ਕੁੱਝ ਹੋਰ ਆਗੂਆਂ ਵਿਰੁਧ ਸਰਕਾਰ ਨੇ ਈਦ ਦੀ ਨਮਾਜ਼ ਅਦਾ ਕਰਨ ’ਤੇ ਪਾਬੰਦੀ ਲਗਾਈ ਸੀ ਜਿਸ ਦੇ ਜਵਾਬ ਵਿਚ ਇਹ ਹਿੰਸਕ ਘਟਨਾਵਾਂ ਵਾਪਰੀਆਂ ਹਨ।              (ਪੀ.ਟੀ.ਆਈ.)